كل يوم
وأنا جاية من المدرسة
الاقي ناس متجمعة وبتزعق
واللي يزق دة
واللي يضرب دة
واللي تشد طرحة دي
واللي ينط هنا
باينها عركة
لاااااااااااااااااا
دول بيشتروا عيش
نعم؟!
حد يشتري وهو بيتعارك
آه..
عادي
كدة يبقي أنت أكيد أكيد في مصر
بجد مش معقول يعني أقل حاجة من حقنا
بنعاني منها
يعني أنت لو عايز تشتري عيش لازم تصحي الساعة 7 أو 8 الصبح
وتستني ادام الفرن قبل الزحمة
ومش بعيد تلاقي ناس نايمة جانبه من اليوم اللي قبله ولسة مشتروش برضه
وساعات بيبقي الطابور واصل للجهة التانية من الشارع من كتر الزحمة
ولازم متكونش واخد معاك غير الفلوس اللي حتشتري بيها
عشان زي مانتوا عارفين
في ناس فاعلين خير أوي
الصراحة بقت معاناه فعلاً
ياجماعة دي في ناس بتتعارك و بتتصاب هناك
والأطفال بيتعجّوا ..يعيني والله
أنا بشفهم بعيني
بكون مع صاحبتي وتقوللي أكيد أخويا جوّا بيعاني وسطيهم
والله احنا شعب ليه الجنة من اللي بيشوفه
عارفين
مثلاً دلوقتي لو حد عايز يشتري شقة
ويكون موقعها استراتيجي استراتيجي يعني
يبقي بدل ما"تري البحر"
يبقي" تري الفرن"
ومع السلامو عليكووو
.gif)
22 Comments:
March 6, 2008 9:38 PM
March 6, 2008 10:35 PM
يا حبيبي يا بابا وانا اللي ظلمته واقول يا ترى بيقوم الصبح بدري ينزل كدا ليه من غير ما يسيب لنا خبر اتاريه بيروح يقف في الفرن
ويرجع لنا بالعيش وهو فرحان اووووووووي
يا حبيبي يا بابا وانا اللي ظلمتك وكنت ناويه افتن عليك واقول لماما بس طلعت براءه يا مسكين
عن اذنك يا ميوية الحق ابوس ايدين بابا واكل لي رغيفين خزين لاحسن بعد كدا مش هنلاقيه
بجد والله مأساه
الواحد يقف في الطابور لابس اخر شياكه يطلع يلاقي الجاكت مع شخص الكرفاته مع حد والقميص مع حد تاني والحمد لله انهم بيقدروا يحتفظوا بباقي برستيجهم
بوست لذيذ
بقولك لو ادامك شقه بتطل على فرن يكون بلدي عشان خاتري
شوفي لي مدا وليكي العيش يا قمر مش الحلاوة
تحياتي وحبي
March 6, 2008 10:35 PM
هههههههه
حلوة تطل ع الفرن دى
انا والدى برضه تقريباً كل يوم بيحكيلنا عن مغامرات الفرن
ومن قريب اتسرق منه 12جنية هههههه
March 7, 2008 12:50 AM
تحياتى لكل مناضل بيوقف فى طابور العيش
وتحياتى لكل كناضل بعد الوقفه دى كلها مش بيجيلوا سكته قلبيه من شكل رغيف العيش
March 7, 2008 12:06 PM
هههههههههههههههههههههه
جميله اوي يا مي
انا لما بروح اصلي الفجر
بشوف ناس فعلا قاعده مستنيه الفرن لماا يفتح
اه والله
بس زي ما انتي قولتي المصريين اهم
ده مش بس في طبور العيش
ده انا شوفت حجات تكسف
يعني اي حاجه بالمجان
شوفي انتي بقى
هههههههههههههه
سلام على راي منمن
وتحياتي
احمد
March 7, 2008 5:13 PM
ميويه ياقمر
وحشتيني
انا بالنسبالي بقه العيش بيجلنا لحد عندنا
لو عايزة رغفين ابعتهملك وانا ليا غيرك ياقمر
وبالنبسه لاسكندرية انا احتمال انزل قريب هابقي اقولك
سلاموووووووووووز
وزة
March 7, 2008 5:42 PM
عارفة يا مي
أن ليّا واحد صاحبي انضرب هو و أبوه في طابور عيش
بالسكاكين و المطاوي
قعد في المستشفى بعدها شهر بيتعالج
يعنى الواحد يروح علشان يجيب عيش علشان ياكل علشان يعيش
يقوم مضروب بالسكاكين
و ده كله علشان احنا أكيد أكيد في مصر
عاجبك كده يا مصر
March 8, 2008 2:24 AM
أنا سمعت انهم هايوزعوا العيش بالبطاقه والواحد ليه رغيف و نص
ربنا عالمفتري :(
March 8, 2008 2:53 AM
ميويه والله انتي عسل
الموقع الاستراتيجي جنب الفرن
طيب والله العظيم انتي بتقولي فيها
ابي عايز يشتريلنا بيت لقيته مودينا في شارع كويس اه بس مش متوقع ال ايه بصي ده كله مميزات في فرن عيش قدامنا
قعدت اضحك اوي
اتاريه عنده حق بقي
:))))))))))
March 8, 2008 11:17 PM
قبلة الحياة
ههههههههههههههههه
شفتي بقي؟؟آديكي عرفتي المعاناة اللي بيعانيها باباكي وعرفتي ليه بيرجع فرحان
الله يكون في عون باباهاتانا وماماهاتنا
هههههههه
أصل أنا عمري مجبت عيش من فرن بلدي لكن فينو آه
عشان لو بلدي انسي إني أرجع البيت
March 8, 2008 11:24 PM
حمامة
ههههههههه
12 جنيه
عشان كدة بقول المفروض لما نجيب عيش مايبقاش معانا غير الفلوس اللي حنشتري بيها
طلع عندي حق
شكراً علي التعليق الحلوو
March 8, 2008 11:27 PM
بطوط حبوب
تحياتك وصلت
المفروض يبنوا عيادة ملحقة بالفرن عشالن اللي يجيلوا سكتة قلبية من العيش
ههههه
نورت
March 8, 2008 11:30 PM
أمير الهدوء
هههههههههه
من الفجر كمان ؟؟يعني مش الساعة 7 أو 8؟؟
آهي كملت
نورت المدونة وشكرا لمتابعتك يا أحمد
March 8, 2008 11:33 PM
أنين الحزن
وزووووووزة
انت وحشاني أكتر
إزيك؟؟ منورة دايما
يا بختك يا عم ابقي ابعتلناماشي معاكي رغيفين
وتنوري اسكندرية
سلامووووووز
March 8, 2008 11:35 PM
نيجرو
لا حول ولا قوة إلا بالله
بالسكاكين والمطاوي كمان؟
طيب وبالنسبة للشهر اللي قضاه في المستشفي..حد كان بيجيبله العيش ولا لأ؟
ربنا معاااااناااا
March 8, 2008 11:36 PM
نور
عيش بالبطاقة؟
هيا ناقصة
اللي يعيش ياما يشوف
نورت
March 8, 2008 11:37 PM
عاشقة الفردوس
إزيك عاملة إيه؟
منوووووووورة
هههههههههههههههههههههه
شفتي؟؟
نورتي
March 9, 2008 8:10 PM
بجد احنا وصلنا لمراحل وحشة اوووي
انا بقرا كل يوم بلاوي عن موضوع طابور العيش ده
من اول الراجل اللي لبس نقاب علشان يقف في طابور السيدات و اكتشفوا و ضربوه و بعد ما خلصوا خناق قام وقف تاني
لحد الراجل اللي وقف 3 ساعات علي ما جاب بجنية عيش
سابه علي جنب و راح يجيب كيس يحطهم فيه
رجع ملقاش العيش
وراح القسم علشان يعمل محضر !!
بجد لنا الله
و ربنا يسترها علي عبيده
March 10, 2008 12:18 AM
bongo
إيه دة؟؟
تصدقي عمري ماسمعت عن الراجل اللي لبس النقاب دة
هي وصلت للدرجة دي
كل دة عشان العيش
بس بجد الله يكون في عون الراجل اللي اتسرق منه العيش ليه حق يعمل محضر والله
نورتي يا بونجو
March 10, 2008 1:28 AM
والله يامى انتى طلعتى حكايه
هههههههههههههههههههههههههههههههه
على فكره انا ميوي برده
March 10, 2008 1:32 AM
أمواج
ههههههههههه
ميوي برضه
علي فكرة ماما بتدلعني بالاسم دة
وعلي فكرة برضه صورتك بتاعة تاتي كنت حطاها مرة علي موبايلي عشان فيها حرفي وحرفك برضه
ههههههه
نورتييييييييييي
March 19, 2008 9:04 PM
هههه .. يا بنتي ده بيعتبروا اللي يموت في طابور العيش دلوقتي شهيد .. ههه .. يعني بدل ما تحاربي و دياولو .. عليكي باقرب فرن .. أنا بقى بأقترح يسموا الأفران بعد كده فرن غزه .. فرن الشيشان و كده .. عشان الدور يتحبك .. ربنا يهديهم و يهدينا
تحياتي
Post a Comment