شنطة تايهة يا ولاد الحلال

السلاااااااااام عليكم

لايديز اند جركنمن.. قصدي جنتلمن

عمركم كنت ناويين تقضوا مصيف أو إجازة
وحصلت حاجة نكدت عليكوا؟؟ بعد الشر يعني؟؟
أنا حصلي كدة
الحكاية دي حكيتها في المدونة القديمة بس افتكرتها فقولت اكتبها تاني

---------------------------
كنا ناويين نصيف ..وقولنا نروح نادي الظباط اللي في العجمي
وكنا مستنيين حد عشان يوصلنا مكان الشاليه وكنا مستنينه عند منطقة عمل (عند الدخيلة في العجمي وكدة ) يعني مفيهاش ناس كتير
بس كان في كام راجل كدة من العمال يعني واقفين شايفينا
وكلهم مستغربين :إيه اللي جاب الناس دي هنا؟
ليهم حق أصل المنطقة هناك مفيهاش غير العمال وبس
وكنا حاطين الشنط علي الأرض وكانوا تقريباً خمس شنط
وكانت أختي معاها شنطتها وحاجتها وأنا بعض حاجتي معايا والبعض التاني في الشنطة الكبيرة
ولأن الحلو ميكملش
ولأن لازم كل مصيف يحصل حاجة يا إما محرجة يا مضحكة يا تنكد علينا
الراجل اللي كنا مستنيينه جه واخدنا شنطنا وحاطيناها في العربية ومشينا
وصلنا الشاليه
وعايزين نوضب بقي حاجتنا ونشيل الهدوم من الشنط وكدة

معايا ولا نمتوا ..؟؟

..طيب

أنا كنت فين؟!!

آه..
فماما بتسأل بابا :فين الشنطة اللي كانت معاك؟؟ اللي هي أكبر شنطة
!!قالها :شنطة إيه؟؟
دورنا عليها في كل حتة تحت السراير وفي كل الأوض مع إننا لسة واصلين
ملاقيناهاش
رحنا دورنا في العربية
برضه ملاقيناهاش
يااااااااحلااااوة
كملت
وبابا راح مع قريبنا عند المكان اللي كنا مستنيين فيه
مشفتش شنطة ياعم؟؟لا والله
شنطة تايهة ياولاد الحلال
وانا في الوقت دة كنت علي أعصابي
المهم جم وملاقوهاش هناك
أحلي حاجة إن معظم هدومي فيها
والله أنا عيطت بس دلوقتي وانا بكتب عمّالة أضحك
شر البلية مايضحك بس فعلاً اتغظت.
دي منطقة عمل مفيهاش غير ناس يتعدو علي الصوابع
احنا اتصدمنا يعني حنقضي الأيام دي إزاي من غير هدوم وخصوصاً أنا
وهو فعلاً المصيف خلص قبل مايبتدي؟
وافتكرت آية :"..وعسي أن تكرهوا شيئاً وهو خيٌر لكم وعسي أن تحبوا شيئاً وهو شر لكم والله يعلم وأنتم لا تعلمون " وارتحت بعد كدة بس احنا برضه مسمحناش لحاجة زي كدة ان هي تنكد علينا وأنا اخدت هدوم من بنت خالتي وكانت حوسة الصراحة
بس تعرفوا بابا قاللي حاجة لما سألته احنا ليه ملاقيناش الشنطة و مين حيكون اخدها؟
راح قاللي انت فاكرة نفسك فين .. انت في مصر يا بنتي يعني تنسي حاجة انسي إن انتي تلاقيها تاني بس الصراحة انا استفدت من الموقف دة وحمدت ربنا إن هي جت علي اد الهدوم يعني مش حاجة مهمة دهب مثلاً ولا كاميرا ولا حاجة زي مابرضه حصلت لمعارف لينا

بس لو شفته اللي اخد الشنطة دة

مااااااااشي..

المهم إن احنا الحمد لله اتصرفنا وقضينا الأيام عادي ونسينا الموقف دة

----

--

-

يللا سلام بقي عشان لازم أروح أنام