بدل التوك توك..بقت تِك تِك

السلام عليكم
انا عارفة إني كسلت عن التدوين
لكن الكسل (هو في الحقيقة مش كسل) مرتبط بالتدوينة دي
وأنا كتبت عن الموضوع دة اكتر من مرة في المدونة القديمة
لكن أعمل إيه ماواراييش غيره
---------------
كنت بحسبها مرحلة زي أي مرحلة دراسية مريت بيها
طبعاً عرفتوها : الثانوية العامية
حتقولوا:" ييييييه..قرفتينا بقي ..هوانتي أول ولا آخر واحدة تدخل ثانوية عامة"
حقولكوا:"استنوا عليا بس"
أنا بجد زهقت وتعبت جسدياً ونفسياً
نفسياً بقيت عصبية جداً وبتنرفز بسرعة ومعتقدش إني كنت كدة الأول
وياسلام بقي لو يوم فيه درس
"حتقولوا :" هيييييييييه انتي بتاخدي دروس خصوصية يا مي..اخص
حقولوكوا: "والله مش بمزاجي ..دة أنا كنت رفضاها من الأول"
لكن بابا وماما أصروا وقالوا : كله بياخد و عشان المدرس يبقي متابعك ومتكسليش عن المادة و..الخ
أنا من الأول كنت رافضة مبدأ الدروس الخصوصية دة
مبحبش شغل المذكرات والملل دة
ومراجعات واللي يعيدوه يزيدوه
مسمعتوش عن الإختراع الجديد
بدل التوك توك
بقت تِك تِك
دي شبه المينيفيستو كدة في الحجم
لأ والمفاجأة .. فيها كل النحو
للحجز والإستعلام اتصل علي 09009009
يا جماعة كل حاجة بقت بسبس ..ا..قصدي بزنس
حتي التعليم
بعض وأنا بقول بعض المدرسين محترفين في إختراع مراجعات ومذكرات وروح السنتر دة وتعالي للمعهد دة
والله يكون في عون الآباء والأمهات
بجد كفااية بقي
أنا بمشي في الشارع بلاقي البنات والأولاد ماسكين الكتب والمذكرات ونشاط غير عادي ورايحين الدروس
وماليين الشارع
وإعلانات المدرسين عن حصص ومحاضرات..دول بيعملوا كروت كمان
ويقولك للحجز اتصل علي .......أو ارسل ايميل علي .......
و دي أحدث الطرق
علي الفلوس لكن تعالي بقي للمدرسة الصبح ::صباح الخيييييييير
كسل وملل وتضييع وقت ومرواح عشان مجرد أيام الغياب متضعش مننا ومنتفصلش
وملل ورتابة أثناء اليوم الدراسي وحاجة الصراحة .. بيبقي شكلنا كدة بالظبط (بس طبعاً الفصل مش بالنضافة دي)
أنا نفسي أعرف دور المدرسة إيه إذا كان هما اللي بيضطرونا اننا ناخد دروس خصوصية
اما بقي بالنسبة للنظام واحترام الوقت فما شاء الله عشرة علي عشرة
ممكن حضرتك تيجي بعد الحصة الأولي وتعد زي اللي جي بدري بالظبط
والطابور ونشيد زبادي زبادي اللي بلكاد حد بيقوله
حاجة تمام تمام
وبعد كل التعب دة بعضنا يدخل كلية مش طايقها
-----------
في مدرسة عندي بتقولنا" ليه الإحباط والتشاؤم اللي انتوا فيه دة
اصلها متعرفش
---------------------
أنا ممكن اكمل بس كفاية
----------
و الحمد لله فضفت شوية ورفعت روحكوا المعنوية صح.. :) ..بس اعذروني علي إني مش بدون بإنتظام
وآديكوا عرفتوا السبب
وأتمني لكل ضحية من ضحايا الثانوية التوفيق وإن شاء الله حيفرج عننا كلها اربع خمس شهور وربنا يقدرنا نطلع نص المدة حسن سير وسلوك
و س ل ا م